漸寒 2月28日 星期三
臨放工嘅時候,大概係五點五十分左右,我聽到一位同事打咭收工,公司個咭鐘離我嘅坐位似近還遠,明明就在我的眼前,但總係伸手摸它不到......那位同事打完咭之後講出一句話：「無驚無險又放工!」,係我今年二月最啱聽嘅說話之一,當然「恭喜發財」始終至係No.1,聽完呢句精景話之後我成個人呆左一陣,反問自己做咩仲唔收工,二月份正式結束喇......可惜到最後我都冇早收工,到八點幾我走去銀行check check出糧未,點知好多人都排緊隊等提款,一大班遲收工嘅打工仔就連放工都咁忙,辛苦大家喇~
後記: 一次失敗，並不代表什麼，該站起來，學習成長，生命才有未來。

涼一點 2月27日 星期二
極度眼瞓,好鬼眼瞓,都唔知呢兩日搞咩鬼,夜晚竟然瞓唔著喎,我已經依照返平日嘅生活嘅習慣啦,點解都係瞓得唔好呢? 放假之前幾日仲好地地,食鬼又瞓得,加上又冇覺得有咩緊張,好輕鬆咁等待假期嘅來臨......到放完足足一個禮拜假之後,情況竟然出乎我嘅意料之外,明明眼瞓得鬼死咁緊要啦,但係始終一瞓落床就難以入睡,我已經試過好多種方法,換床舖係其一,之後再試過幾種心理入睡法,都係冇太大嘅改善......但係返到公司都唔使十分鐘就瞓著,仲要係熟睡喎~
後記: 愛與生命是分不開的，我們必須用耳聽，用心靈見證；在世界許多角落，都有等著我們去關懷的聲音。

涼感 2月26日 星期一
一早返到公司就即刻留意到一樣嘢,個white board度好似寫住一句東西,原來係我地公司位新嚟嘅姐姐仔寫上,加上佢係用雞乸咁大隻字嚟寫,明眼人用肉眼點睇都睇唔到啦,可惜我今日冇患到雞眼,如果唔係我一定睇得到嘅......經過一輪解釋之後,原來放新年假之前已經寫上,只係當日冇同事肯用雞眼去睇,結論：『今日中午一點半於潮豪城食開年飯』! 大伙兒去到酒樓,嘩嘩嘩......三聲嘩之後,我眼見酒樓門外人山人海,一早訂好枱都要等餐飽呀,最後食完個$1680嘅慢速開年套餐,所有人一齊對錶,光陰似箭呀......下午茶時段三點半已經到喇~
後記: 中國人有獨特的自行車情結，多少理想和願望都是在自行車上實現的。

清涼 2月25日 星期日
返半日工又再放假了......有點兒唔習慣,尋日突然之間要我七點幾起身返工,跟住今朝又嚟一個超時睡眠,話時話尋晚又真係幾好瞓,瞓得安心又安樂,今日瞓到十一點半呀......一個冇女朋友嘅孤家寡佬留响屋企,跟住就冇咩好做喇,又係同平日一樣囉,咩都唔做淨係休息,仲有三日就結束二月份,同時二月份糧又出喇,真係快到連我都唔相信~
後記: 廣東人喜吃粥，若懂食補，自可補氣血，養筋骨，固脾胃；藥食同源，對身體大有療效。

風平 2月24日 星期六
終於都要開工喇,就算係有幾咁唔捨得呢個假期,始終都係要放手吧! 尋晚本應好早就去瞓覺,可惜長假後症候群嘅出現,令我整整一晚無法入睡呀,個腦不停係咁諗埋哂D無謂嘢...zzz...最後只聽到鬧鐘一響,原來已經係朝頭早嘅七點十五分,基於絕對唔能夠遲到嘅關係,幾難起身都要迫自己起身,今日本身係星期六,其實冇咩人返工,大多數公司都去到初九先至啟市,不過架巴士同樣爆棚,我都分唔清楚到底呢班人,係咪真係去返工呢吓~
後記: 幼稚園裡，老師叫小寶起來數數，小寶數著：「一、二、四、五、六‧‧‧‧‧‧」
老師問：「怎麼忘了數『三』呢？」
小寶回答：「因為每次數到『三』，媽媽就要打人。」

好平靜 2月23日 星期五
玩完喇,農曆新年咁就完滿結束,最衰公司唔肯迫我地放到初九,初七係星期六仲要係人日,話哂都係人人生日啦,搞到我兩頭唔到岸,我個心又唔想咁快開工住,一開工就要比人追呢樣追嗰樣,心中冇火點有熱誠做嘢呢? 我諗我只係放假放到濛咗,返到公司應該會冇事~
後記: 鼓勵他人，也能激勵自己，後記自來也！

好多雲 2月22日 星期四
由初二玩到初四真係受不了......足足兩個晚上冇瞓過覺,如果我唔係頂唔順的話,一定玩到初六先返,不過都係算數吧啦,身體要緊! 今個農曆新年除左恭喜發財講得最多之外,其次就係身體健康,我祝朋友身體健康而自己竟然不健康......點可能呢!!! 唯有早些回家休息啦......講起今朝真誇張,竟然比我瞓到兩點鐘先起身,近呢一年嚟都未試過,就算係之前世界盃都未去到咁誇,所以話今次真係體力透支了~
後記: 冬至黑，過年疏；冬至疏，過年黑。(冬至無太陽，新年一定晴天；冬至放晴，新年就下雨。)

晴 2月21日 星期三
朋友們我又玩完返嚟喇,其實都冇咩玩過,最想玩嘅放煙花都係玩唔到,本應想搵一大班蒲友過年,所以專程上去大陸過年,可惜大部份友仔都返哂鄉下過年,只係得番兩三個留低,而豐厚嘅利是已成煙花,一爆就冇......到最後初三就只得番我一個人過喇,不過四海之內都會有蒲友嘅出現,當我自己一個人嘅時候,新認識嘅蒲友自然地出現,而且仲要係一拍即合,大家一齊玩左一晚,可稱得上係朋友了~
後記: 冬至在月頭，要冷在年底；冬至在在月尾，要冷在正月；冬至在月中，無雪也無霜。

絲絲雨 2月18日 星期日
完全不一樣嘅星期日,跟過往嘅星期日有些分別,踏入農曆新年係其中一個分別,而另一個分別,就係心情,感覺係好重要好緊要,如果我普通放星期日會時不時諗起工作,但係今日就好唔同,豬年嘅正月初一帶比我......高興嘅心情......愉快嘅笑容......豐富嘅三餐......忘憂嘅節日......充足嘅睡眠......寧靜嘅空間......等等! 沒有東西能夠換取今日~
後記: 跌倒，並不可恥；可恥的是，跌倒了，不知爬起來。

陰 2月17日 星期六
年廿九部電腦竟然唔聽話,入唔到windows,搞到我要即刻做補救功夫,又試boot機碟,仲試埋重新裝過windows......最後都係搞佢唔掂,唯有出最後一招啦,format部電腦就咩都唔使煩,但係响format之前先要做一個指定動作,就係做back up喇! 成個過程差唔多用左三個鐘頭,再開機之後快好多,不過再要用多一個鐘左右download返哂D嘢,仲有更新呢......尋晚搞到一點幾先有得瞓,不過見今日係假期都冇咩所謂啦~
後記: 如果東西沒有破碎，就有可能修好。